مساء الخير / ,

* طرت لي مجلة ماجد ايام اول خخخ !

ضايق صدري وابي افضفض والقى حل ..
صدق ابي القى حل ,

قبل لا اقول مشكلتي الحاليه ..
طبعاً هي ناتجه عن تراكمات سابقه .

مشكلتي مع أمي الله يهديها :(
بالبدايه خل اشرح لكم كل شي يتعلق بالمشكله ( راعية طويله خخخ ) .

أمي ماشاء الله عليها أيام كانت تدرس بالجامعه كانت دفره ماشاء الله ..
مقطعه الكتب والله ميزها بذكاء ماشاء الله عليها .

وكانت دايم تطلع الاولى ع الدفعه ومن هالكلام .
بالتالي / تتمنى نكون مثلها ,

ربي رزقها ببنتين الذكاء عطاني اياه - واشك بهذا - خخخخ والدفاره لأختي ,
سبحان الله مانجمع اللي فيها بوحده .. ارزاق .

انا من النوع اللي ماحب الدراسه أول بأول ..
من ايام المدارس وانا على هالطبع ,
كنت ما أمسك الكتاب الا ليلة الاختبار واجيب الفل مارك .
بس من سنه ونص تقريباً صرت اذاكر اول بأول :$

بعكس اختي تماماً
كانت تذاكر يومياً وساعات كثيره ماشاء الله عليها .
وتجيب الفل مارك .

لكن الفرق بمعاملة أمي ..
امي دايم تشوفني البنت المستهتره ,
دايم طقاق معها على هالسالفه .

+ للأسف دايم تحقرني :d
مع العلم طول فترة دراستي ماكنت اجيب اقل من 99 % اللهم بثالث ثانوي بالترم الثاني وهذا بسبب ظروف جتني للأسف والا الترم الأول جبت 100 ( ايه ماشاء الله خخخ )

لا الصدق من اني اقول النسب عشان ابين لكم اني كنت اجيب زين ومع ذلك مايعجب أمي !
عمرها ماتعترف ان هالنسبه زينه .
بعكس لما اختي تجيبها ماغير تمدحها قدام كل الناس
لأن بنظرها انا ما استحقها ,

دايم تحقرني قدام خالاتي وخالاتي يقلبون عليها :011:
يعني هم يدرون اني زينه وهي للحين ماتدري :( ؟
( ما اتلكم عن دراسه وبس :/ )

لدرجة ان محد يعرف اني شاطره من اخواني من كثر ما أمي مهمشتني
مره من المرات تنصح اخوي تقول له شد حيلك وجب لنا درجات زينه صير مثل خواتك

قال لها خواتي ؟ اخبر وحده بس اللي زينه :d!
قالت لا فلانه بعد كانت ماتجيب اقل من 99 قعد يضحك خخخخخخخخخخ !
يقول ماعمري سمعتك تقولين انها زينه
ويحسب انها تنصب

شفتي يايمه :(

المشكله تدرون وين ؟
ان امي دايم تسافر مع ابوي والبيت يطيح على راسي .
واختي طول عمرها ماتشيل الا مسؤولية نفسها ,
وانا اللي اتعب مع اخواني .

مع ذلك امي ماتشوف ان هالشي ممكن كان يأثر ع الدراسه .

اخبر الترم اللي راح .
سافرت ولاطقت لي خبر يوم ان عندي اختبار .
وجبت D .. لأني ماكنت انام الا ساعتين باليوم طول فترة سفرهم

يوم شفت ورقة اختباري .. كنت القى نفسي احل صح ولما اجي احدد الاجابه في الصفحه الأولى احدد غلط لأن مو مركزه من كثر مافيني نوم

صدق اني يوم كلمت الاردني تفهم وحطي لي الاجابات صح ورفع الدرجه .
بس اللي صار يقهر .


قلت لأمي .. قالت الا من زود الاستهتار
ماحست ان السبب اني ماغير مطارد مع اخواني ..
اخاف اغفى وتروح عليهم صلاة الفجر
اخاف اغفي ومايروحون المدرسه :(

نجي للي صار اليوم

اليوم كان حفل المتفوقات بالجامعه .
صار لي اسبوع ادري ان الحفل بيصير ..

وانا مو من المتفوقات بحكم ان معدلي 4 وشوي بس ماوصل 4 ونص . ( وش يسوون لك خخ :( )

واختي من ضمن المتفوقات .
طبعا شتان بين قسمي وقسم اختي ,

امس امي تقول لي تروحين الحفل معي عشان اختك
قلت لها لا مابروح وراي اختبار الاربعا وسفر مايمديني

مع العلم اني كنت اقدر اروح ساعه لأن دوامي اليوم ساعه بس .

أنا مارحت لأن ماودي اضيق صدر امي يوم تشوف بعض من بنات دفعتي يتكرمون وانا قاعده جنبها .
اليوم من الصبح كنت متضايقه لأن مع اني شديت حيلي السنه اللي راحت وكرفت كرف وكنت اذاكر اول بأول ,
مع كذا ماارتفع معدلي بالشكل المطلوب عشان اكون ضمن المتفوقات
لأن ملعنة بعض الدكاتره واللي يعطون درجات من راسهم ماكنت في صفي ذيك السنه :(
وهالشي ماراح تشوفه امي .

انا وربي ماطقيت خبر للتفوق
لكن ودي فيه مره بس عشان افرح امي :(
لأن اعرف مستواي في الشغل .. اعرف اني فاهمه وزينه :(

الترم اللي راح شديت حيلي مره ومعدلي ارتفع
والترم هذا ناويه ان شاء الله .
ونقول عسى نطلع منهم السنه الجايه ؟

اللي يزعل
ان امي جت اليوم وانا قاعده تو مع بنت خالتي ومعها وتقعد تهاوش وتعاير !
تقول لي فلانه من دفعتك تكرمت وفلانه وفلانه تبين اعدد الأسماء ؟
قلت لها مايحتاج تعددين انا اعددهم ولو اني ماعرفهم وابي اعرف كنت جيت معك للحفل .

قالت ايه طبعا منتي منهم .
انتي وش همك اصلا ؟
ماغير طبخ .!

انا مدري الطبخ عيب :( ؟
أول مره اشوف ام ماتنبسط لأن بنتها تطبخ :(

قلت لها مو همي طبخ وبس !
اتوقع اني شاده حيله الترم اللي راح بس الترم اللي راح مو محسوب من تفوق هالسنه
واتوقع ان لو كانهم ياخذون ع التراكمي فاعرفي ان السبب اللي نزلني بيكون اول سنه لي بالجامعه ( كانت ظروفي زفت بأول سنه وهي تدري :( )

وقعدت تتهزى وضيقت صدري وقمت من عندهم .
رحت غرفتي ابكي وربي .

على كثر ما اسوي ماتغير نظرتها لي :(
عمرها ماتحسسني اني زينه بشي !

وش اسوي ؟
كلمتها ألف مره بهداوه بعد وربي بس ماتغير شي :(

مو غرور لكن ثقه ..
ان الله كتب لي وصار اللي ابي وتزوجت هالسنه والله اني داريه انها بتحس بقيمتي لارحت عنها .
بس ادعو ان الوظيفه تجي بعض الناس .

ماتحسون بالشي الا لافقدتوه :(
واذكرك يمه :(
أحد يصير عنده مثل هالبنت ويزعلها خخخخخ :24 ؟

يمكن تحسونها مشكلة بزارين خخخ
بس والله انها مضيقه صدري
لأن دارستي تعتمد على نفسيتي للأسف .

واختباري بكرا ولا ودي اجيب العيد عشان نفسيتي زفت :(

* نصيحه لكل اللي بيصرون بكرا اباء وامهات /..
عززوا ثقة عيالكم بأنفسهم دايم .
خلوا اهتماماتهم من اهتماماتكم .
عالجوا نقاط الضعف فيهم وحسنوا نقاط القوة .

انت سويتي اللي عليك ؟
راضيه عن نفسك من ناحيه الدراسه ؟
سويتي كل شي لامك وبتسوين بعد ؟
وقت ماتحسين نفسك مقصره بشي رحتي وسويتيه ؟

خلاص وقفي هنا ، إنتِ طاقه وتخلص
ماراح أقولك طنشي اخوانك وأمك علشان يعرفون مقدارك
مع ان اختك مسويه نفس الطريقه وشوفي وينها !

كانه ترا دايم الناجح يحقر :24
لا جد تذكرت أمي احيانا نفس حركات امك وش قصتهم ؟
ولا يفكها بالازمات وقايم لهم وعيالها إلا محاكيتك
وانت بنظرهم البنت المستهتره اللي ماتحس الجريئه قله أدب الا دقيقه :d
بس ترا لك معزه وحب خاص بقلبها .. ترا من زود المحبه تسوي كذا :d مثل لاقالو لك يمون بزياده

بس مششششي ، بوقف حالي عشانهم ؟
بتقولين أهلي !
تعرفين وش معنى طنشي ؟ طنششششششي
سوي كل اللي يريحك وتحسينه بيرضيها بس لاتحطين في بالك أي شي
احلف لك لو تبعدين عنها كم يوم شوفي وش بتصير ولا وش بتقول

انت لو من أول مسويه لك حظر جو وتدخلات كان مايصير لك أي شي أنت ماتبينه !
يعني تحطين لكل شخص حد في كيف يتعامل معك
معليش حتى لو اهلك بس اذا كان البعض موب لم الاحترام ويعرف قدرك وش تسوين ؟

عندك مثلاً اخوي مراهق مافيه أحد طاق له خبر حتى أمي وابوي مايحترم احد
اذا حس انه محاصر من كل شخص حوله وقريب ينفجر يطلع فيها أنا القوي وهو من جنبها ، بس اتحداك يرفع صوته علي ولا يقل أدبه باي كلام معاي موب تميلح ولا قوه معه
بس فيه حد بيني وبينه في انك ماتتجاوز خط معين معي
أنا عارفه المراهق وولد وكيف طريقه تعاملهم الخشنه ، الى اخوي الكبير تخيلي يتجاوز عليه أحياناً ، كل هذا علشان ماعرفو شلون يتعاملون مع المراهق اللي قدامهم ، الحين لاتنرفزت وصرخت عليه يسكت مايقول ولا يرد علي مثلهم لانه عارف انه غلط بشي معي . مالها دخل السالفه ايه بس اضرب مثال لك كلام برايفت (تكفين سلكيها:24)

أمك لها معامله خاصه بعدين اقولها لك خخخخخخ
بس أهم شي ماتحسين انك قصرتي بشي وانت سويتي لها كل شي
أمك نشأت كذا طالعه كذا ماتبي قدامها الا نجاح وتفوق علشان كذا ماتتحمل بنتها ناقصه شي من ناحيه انها تكون متفوقه وتتكرم مع المتفوقات (بالنسبه لها شي كبير ان بنتها ماتتكرم وهي كانت من الدفعات الأولى)
شديتي حيلك ايه بس هي ماتتعترف نسيباً بـالعذر هذا
انتِ مع نفسك لاتربطين قومتك في البيت بدراستك
غصب عليك معاك بالشي بس حطي في بالك انه ماراح يجي على بالها هالكلام .

أهم شي ثم أهم شي ماتبدين المهم على الأهم
ماتبدين هالمطبخ على دراستك حاولي تفكين عنه شوي
غيري الجو في انك ماتدخلين المطبخ ولاعاد تطبخين لهم
يحسون انهم فقدو شي غير !
شي عادي بس بيغير عليك لو قليل بيحسون بخفتك في اهتمامك لهم

تكلمت كثير ؟ بس يارب ينفهم كلامي :24
وأتمنى لك حياة سعيده في ظل من تحبيه < تفو
لي رجعه لو لزم الأمر :d < ارقدي أحسن

راجعة ,

هلا وغلا
ومساءك ورد :fl

بالنسبة لمشكلتك مع أمك شي طبيعي
إنها تزن وتزعج من ناحية الدراسه ،
أمك من كانت وهي دفره ، وتبي عيالها يطلعون نفسها
ماتدري ان لكل شخص وله قدرات ،
أوكي انا ذكيه وأختي تحفظ والثالثه تذاكر بس مايبين
شي طبيعي هذا وكثير نصادف ناس من هالنومنه ،
أمك مشكلتها معك بحكم إنك الكبيره
وبحكم إن إختك مثل ماقلتي تذاكر وتجيب اللي يرضيها
( لأني لاحظت مايرضي أمك الا الفل مارك ) بعكسك إنتِ واجهتك ظروف وأثرت عليك
فأشوف إن أختك سحبت البساط من تحتك ،
صارت أمك بس مشتغله مقارنات بينك وبينها ،
وطبعا هذا الشي يذبح القلب بغض النظر عن تأثيره على دراستك وحياتك ..

شي واحد حطيه ببالك ،، إنك تتجنبي المصادمات مع أمك
خلاص اذا إنتِ سويتي كل شي حتى تطلبين رضاها بس مالقيتي الا العكس ،
عيشي يومك بكل مافيه ،، بالبدايه بتحصلين صعوبه بس قاومي
بعد فتره بتلاقين أمك بتلتفت لك تدريجيا ً..
كيف تعيشين يومك ..؟
طبخ وإتركيه
إجتهدي وذاكري وجيبي اللي يرضيك
أمك وإذا لاحظت الفقاعه اللي كونتيها حواليك ،
بتسألك .؟
قولي لها : والله حاولت فيك يمين يسار
بس مالقيت منك الا الصد وتكسير المجاديف
أنا درست وتعبت وقايمه بشغلي وزود بس مالقيت منك الا العكس :(
فـ لاتعتبرينها شغل تمنن وحركات بزران ، للأسف لا ..!
لأن مقصدي شي واحد اللي هو ( تبطلين شغل المقارنات وشغل التهزيء وتوابعه )

الكلام يسحب بعضه ،
بس هذا اللي خطر ببالي ..
والله يكون بعونك ويفرج همك :fl

كنكون صدقيني هذا شي طبيعي مره مره مره :d

عادي يختي كلنـا كذا .. دايماً الاخت الكبيرهـ بالبيت هي الي تأكلهـا بلحيتها :24
الحين أنـا حبوبه وقلبي طيب وماحب المشاكل :$ بس لساني يدل أني عوبا وشريرهـ
دايماً لما نتاطق أنا ومشاعل أختي .. يصدقونهـا ومايصدقوني :( أصير أنا الغلطانه وهي الصح بسم الله عليهـا مع أنها هي العنز والي تغلط دايماً :24

غير كذا , أيام الاختبارات كللللللللللللل أخواني داجين مايذاكروون وعادي ماتقولهم شي ! :39:
وأنـا يوم بديت أختباراات ماغير تسحب هالبيبي واللاب والايباد وكل وسائل الترفيه .. مع العلم أني أدفر منهم كلهم ودايم أنا الي انجح ودرجاتي كويسه :$
لا وأزيدك من الشعر بيت .. أذا نجحت مايعطوني مكافأهـ والعام المناحيس الاثنين الي بعدي رسبّو مادريت الا أمي وأبوي معطينهم فلوس وقايلين لهم اطلعو وسعو صدوركم :39: ياسلالالالالالالالالالالالالالالالالالالالالالالال الالالالالالالالالالالالام !!

لو بتقارنين بين المعامله بتلقين مليون شي .. صح انها اشياء سخيفه لو تقولينها لأحد .. بس تأثر فيك وتحسينهم مايحبونك أو يغلون أحد عن أحد
مرهـ تزاعلت مع أبوي عشان سالفه مدري وش بس أتذكر كان مره مزعلني وحسيت أنه مايحبني " جور بنات " :d
ثاني يوم تعبت بالجامعه وودوني المستشفى وكان هو بالمطار بيسافر دقت عليه أمي وعلمته أني بالمستشفى مادريت شوي الا هو جاي سحب على السفر عشان يتطمن علي :h
يعني لو يصير لك أي شي بتلقينهم يرتاعون عليك وتحسين بقيمتك عندهم وتشوفينها بعيونك :$:h
بخصوص الطبخ ههههههههههه
يلعن بليسك أمي تترجاني ترجي أسوي شي تبي تحس بالسناعه وأنـا مطنشه .. وأنتي أمك تعاريك بالطبخ ؟ أدبيها خخ لاعاد تطبخين صيري رفلا :24
صح الاهل دايم عليهم حركات تقهر لكن مع هذا كله ربي لا يخلينا ولا يورينـا غلاهم ويخليهم لنـا :h
وصدقيني أمك ماتسوي كذا الا من خوفها عليك وتبيك تطلعين أحسن شي .. أكيد هي حاسه بذكائك ومقهورهـ أن أختك الي أقل منك ذكاء متفوقه وأنتي ماتفوقتي .. لا توسوسين لنفسك وتمرضين نفسك على أمك .. أنتي جزء منها .. تخيلي تقدرين تكرهين وحده من عيونك ؟؟ ماتقدرين :h انتي كذا بالنسبه لأمك حبها لكم كـ حب الشخص لكل اجزاء جسمه مايحب يفقد شي منهم يحب كلهم يكونون موجودين :h " ام التشبيه الي تعرفينه :24 "

هونيهـا وتهون يابنت الحلال سايري مرات .. طنشي مرات .. خليك مرنه معهم سوي الي يحبون والي يبون عشان تكسبين رضاهم :h
توفيقك ونجاحك ورضا ربك من رضا والدينك عليك :h

قلبي معك :h

ياحبيلك بس :h

* طرت لي مجلة ماجد ايام اول خخخ !

تدورين فضولي مثلي ؟ :3: < :24


كنكون صدقيني هذا شي طبيعي مره مره مره :d

زي ماتفضلت يوفا وقالت انه شي طبيعي :24
وحنا مثلتس ترا.. بس قدرة التحمل هو الشي المختلف :b8: < :24
والظاهر انس وصلتي مرحلة الأنهيار :h


شوفي الأم أم ماتغير طبعها أبد .. يمكن لا تزوجتي إن شاء الله بتفقدك أكثر من أخواتك
وأكثر من أي شخص وتقعد تحن عليهم يازين فلانه ويازين فلانه و بتشوفين لادّقت عليك
اختك وهي تقول ذبحتنا امي وهي تقارنّا فيك :22 :h

أمك تعتبرك واجهتها قدام العالم والناس تحس إنك جزء كبير منها ولا ودّها إنها تكون
مقصرة في تعليمك :h يمكن هي تحس بالذنب لأنها تسافر وكذا ولا ودها تحس إن
هالشّي أثر عليك أو على مستواك...مع انه في الواقع أثر عليك :(

بعدين واضح إنها تحبك كثير :3: لدرجة أنها ماتنتبه للإيجابيات اللي تسوينها ..
لو فرضا أنتي حبيتي تتوظفين في مجال معين من زمان ودّك فيه أكثر شي يشغلك
الإيجابيات ولا السلبيات ؟ ...
طبيعي بيصير السلبيات لأن الإيجابيات هاضمتها من زمان وهي اللي خلتك تفكرين
في الوظيفة من الأساس وما يحتاج إنك تذكرينها كثر ما تفكرين بسلبيات الوظيفه
اللي تحتاج من يعدلها :h


بالنسبة للمقارنة عندنا وعندكم خير ..أحس أنه طبع أمومي :24

طيب
قد أرسلتي لها مسج وشرحتي كيف هالشي يأثر على مستواك ؟ و يأثر في نفسيتك ؟
لأن الكلام في الرسايل أكثر أثر من انك تكلمينها وجه لوجه لأنها ممكن تقرا المسج مره مرتين ثلاث
إذا حسيتي إن هالشي تافه وإن أمك من النوع اللي يتريق على الرسايل اللي زي كذا وتتكلم عنها قدام
العالم :24 وكذا .. خلاص لا تسوينها مع ان مفعولها حلو وأثرها كبير في القلب :22:h

،
إذا قالت ليه ماتصيرين زي فلانه وعلانه لا تتضايقين و تناقشينها واضح أن النقاش من
كلامك يزيد الطين بله فتجنبي تناقشينها لأن هالشي يخلي وضعك في عيونها إنك ماتبين
تسمعين كلامها وماتبين تحسنين من مستواك و بتفسّر نقاشك لها على أنك تعاندينها...
حتى لو ماناقشتيها و سويتي روحك عادي لا مباليه بيرتفع ضغطها
و بتحس انك ماتهتمين لكلامها وما تعتبرينها قدوتك تعليميا ..
< ترا ممكن تفسرها كذا لا تستبعدين حطي نفسك محلّها وشوفي..
وهالشي بيحز في خاطرها :(

جربي قوليلها في مثل هالحاله لا جت تهزءك أبشري تامرين من عيوني
مايصير إلا اللي تبينه .. ومن هالكلام الغير متوقع :sm42:< بس لا تقولينها كنس تصرفينها عاد خخخخخخخخ :24

بتستغرب إنك ما ناقشتيها و بتحس إنك فهمتيها :h


،
لدرجة ان محد يعرف اني شاطره من اخواني من كثر ما أمي مهمشتني
مره من المرات تنصح اخوي تقول له شد حيلك وجب لنا درجات زينه صير مثل خواتك

قال لها خواتي ؟ اخبر وحده بس اللي زينه :d!
قالت لا فلانه بعد كانت ماتجيب اقل من 99 قعد يضحك خخخخخخخخخخ !
يقول ماعمري سمعتك تقولين انها زينه
ويحسب انها تنصب


يمكن هي ماتجيب طاريك عند اخوانك بس يكفي إنها قالت بنفسها إنك ممتازه وماتجيبين أقل من 99% :h

والله في بالي حكي كثير .. بس نخليها مسن :sm42:

دوك و لاتضيقين صدرك ولا شي :fl
وادعي ان ربي يحنن قلب اميمتس عليتس و يطول بعمرها ويخليها لكم :sm42::h

ي شييييييخة لاتضيقين صدرك بس
هي جت على هذي على الاقل هذي امي وعلى عيني وراسي
واي شي تسويه اكيد بمصلحتي حتى لو تضايقتني منه
موتك إذا كان اخوك متصلط عليك ويسوي فيها يعننني وهو من جنبها
وليه ووشوله وهذا ماله داعي ومدري ايش
وشوفيه مع مرته لو تقول له وشو ابتسم :011:
الحمد لله والشكر يطلع شطارته على اخته

الله يعينك ي كأنه ويسهل امورك ويرزقك بارجل العجل اللي يريحك
ويقولك ي دهينه لا تنكتين :24
واعذريني على بثارتي وسواليفي :39:

:fl

مشكلتس مايبيلها شيء
في كل الاحوال امتس عطيها اقنور

فحل مشكلتس اما انتس تعرسين والا ترمين نفسك على اقرب حضن دافي
عاد انتي اختاري اللي يجوز لتس:24

اتوقع امك شايفه شبابها فيك :h
وحاسه انك تستاهلين اكثر بس انتي ماتهتمين يعني مقهوره عليك لانه حاسه انك نفسها
واكبر دليل لماقالت لاخوك ماعمرها جابت اجل من 99 معناتها معترفه بأنك ينشد بك الظهر
بس الاهل يبون الكمال لعيالهم مايبون احد احسن منهم :h

نظام المقارنات يابنتي مستحيل مستحيل ماتلقينه في بيت سعودي ياكرههم مير على هيك اسلوب :24
شوفي فلانه وشوفي علانه وهاتك يامقارنات :(

شوفي ياعسل انت حاسه انك سويتي اللي عليك خلااااااااص هنا ستوب كل واحد له طاقه هو يعرفها وهو يحتملها
عجبهم حلو ماعجبهم منتي ملزومه تحملين نفسك لايكلف الله نفس الا وسعها

عودي نفسك اسمعي وطنشي لاتردين لانها وقتها بتصير قلة ادب لورديتي
طوفي اسمعي وانسي تأقلمي على هالشغله اصلن سالفة التطنيش بتفيدك طول عمرك واكبر دليل اختك عايشه جوها ولا عليها

وبالنسبه للطبخ ابد انا ضد امك يأختي مدري وش بهم ماينمون المهارات بس حاولي ماتخلين كل وقتك يطغى يعني قولي انا مقسمه وقتي بحيث الدراسه لها وقت والاشياء اللي احب اسويها لها وقت خل تدري انك منظمه وبتحرم رغبتك وقتها

والله يرزقك برها ويرزقك رضاها يارب :h :fl

هلا كأنه
هو بصراحه مشكلتك الكثير يعاني منها ولو دققتي شوي بتشوفين اغلب الامهات تلقين لازم يكون لها ولد اقرب لها من البقيه لكن هذا الشيء طبيعي وبنفس الوقت مزعج للبقيه
نصيحتي لك اولا: حاولي انك ماتحسسينها انك يامي تراك تعامليني غير واني انا البنت الي اتعب الخ الخ.
جربي العكس تماما الي هي طريقه انك تحببين امك فيك بزياده بمعنى حاولي تكسبين ودها بكل الطرق الممكنه وبكل الوسائل واعررفي مفتاح قلبها ومفتاح الوصول الى شخصيتها واذكري حسانتها امام الجميع وامام والدك واغريقيها بالهدايا حاولي تتقربين لها اكثر وتجنبي قدر الامكان الاحتكاك السلبي مع والدتك،وبدال ماتركزين على ياأمي افهميني انا بنتك وونتي تعاملني غير...
ركزي بس كيف تقدرين توصلين لقلبها وتكسبينها :fl
واخير تذكري شيء مهم جدا الى هو الدعاء وفي الثلث الاخير من اليل ادعي انه تتيسر امورك مع امك بالأضافه الى الصبر وكل شيء بأجره يمكن انتي افضل من ناس كثير عشان كذا ربي يختبرك في اعز الناس لك :fl
ودعواتي لك :fl

معاناة كل اخت كبيرة :(
ما لك حل الا انك ترضين ضميرك من ناحيتها هي اول و تالي امك ..
بس تعلمي بعد انك تطنشين .. صعب .. بس تعلمي و الا حياتك ما راح تمشي
انا من ناحيتي تميز على راحتها بس على الاقل تطّيب خاطري بكلمة و الا تحسسني
انها مقدرة دوري في البيت :m: بس للاسف هالشي غايب عن اغلب الامهات :(
و ان شاء الله تتيسر و تتزوجين و ذيك الساع بتعرف قدرك :h
و انا بعد عندي مشكلة مع امي :d >>>> يا ليل النفسيات :24
خلصوا من كأنه و اعلمكم .. ما له داعي نفتح موضوع جديد و يصير القسم كله نفسية:24

نظام المقارنات يابنتي مستحيل مستحيل ماتلقينه في بيت سعودي ياكرههم مير على هيك اسلوب :24
شوفي فلانه وشوفي علانه وهاتك يامقارنات :(
النظام هذا مع الاسف له مردود سلبي على شخصية الانسان سواء كان ذكر او انثى
وخصوصا المقارنه بين الاخوان .

اما مشكلتك فاتوقع عندك حل اخير اذا مانفع مالك الا الصبر وهو انك تشوفين واحد/ه
له احترام ومعزه خالك مثلاً او خاله وتقولين له السالفه وهو يكلم امك على انفراد .

الطبع يغلب التطبع ، حتى لو حاولتي تحاكينها أو تغييرين من طريقتها منتيب قادره
لانه مسلك او اسلوب هي تتبعه ، تتمنالك الأفضل وتبي تشوفك الأحسن

هي تقدّركل اللي تسوينه ، لكن ماتقدر تثني عليك ممكن لأنها ماتعودت او يمكن الثناء بيثنيك او بيخليك تحسين انك وصلتي للقمه ، فهي كل مره تنقدك عشان تتطورين مثل اللي تضطر تدفك وتخاف تمدحك وتوقفين .

فإذا ماقدرتي تغيرينها ، غيري من نفسك
لا تخلين كلامها يأثر عليك ، لا تفكرين فيه كثير عشان ماتتحطم نفسيتك
غيري وضعك وسوي اللي عليك ، وبترضين على نفسك انتي اول ولاعد يهمك كلام اللي حولك


وبعدين الأوله يصير لها وضع خاص عند أمها ، فعشان كذا تبيك كامله مكمّله لانك خليفتها وأول فرحتها :h

أستغرب من اللي يقولون طنشّي .. أوّلًا وأخيرًا هي أمّك ورضى الله من رضاها عنك ,
التطنيش موب حل ..وحدهـ منّكم كلامه صحيح ولازم تقنّع الثانية
يعني إذا إنتي تشوفينها على خطأ ومعاملتها لك خاطئة أقنعيها بهالشيء أو تقنعك هي إنها تعاملك مثل باقي أخوانك .. أو ع الأقل توضح لك وجهة نظرها وليش تعامك كذا .
الأهل مُستحيل يشوفون فرق في معاملتهم لـ أبنائهم , لازم إنتي تكلميها وتوضحي لها بس مُهم إنك تذكري لها الأسباب اللي خلّتك تفكري كذا ..
ودامك كلمتيها وما نفع فكري في طريقة ثانية توصّلي فيها اللي تحسّي فيه والأفضل تكون بطريقة غير مباشرة ..

مشكلة الدراسة إنّك ما تبذلي كل جهدك مثل أختك الثانية - أو ع الأقل كذا تفكير الوالدهـ -
يعني هي تشوفك مهملة حتى لو معدّلك ممتاز , دامه موب تفوّق وهي عارفه إنك لو شدّيتي حيلك أخذتي التفوّق بالراحة بتعتبر هالمعدّل الممتاز إهمال منّك ..
ضريبة إنّك تكون ذكي البيت للأسف .. كل شيء أقل من قدراتك يُعتبر إهمال :/

أستغرب من اللي يقولون طنشّي .المعنى اللي نقصد فيه طنشي
لا تخلين كلامها يأثر عليك ، لا تفكرين فيه كثير عشان ماتتحطم نفسيتك

موب يعني طنشي لاتهمتمين لها !

ماشاء الله الأخوان ما قصّروا بالردود ..
فحبيت أدلي بدلوي >> كل المشاركة عشان اقول ادلي بدلوي :d
بشغلة ثانوية مو بعيدة عن أساس الموضوع ..

والله يا كأنه أغلبنا ما يعجبه اللي عنده ..
يعني عندك أنا مثلاً ... الله رزقني بأم الله يوفقني على برّها ..
هاديه جداُ جداً جداً .. لدرجة السلبية بعض الأحيان ..
يعني أحياناً أجلس أسولف عليها بأفكار مش ولابد..
ومعتقدات شركية بعض الأحيان .. أنا نفسي مو مقتنع فيها ..
بس أحاول استفزّها للنقاش ..
تدرين وش ترد.. تقول : ( والله ياوليدي عقلك براسك وتعرف خلاصك ) خخـ :d
يعني نفسي مرّه بس تقولي : ( مايصلح .. مايصير .. كذا غلط .. الخ .. )
ودي لو مرّه يحتمي النقاش بيني وبينها .. ودي تلعن خيري .. :d

بالأخير تعليقي ..
وش رايتس تبدلين أمّهات .. وصلى الله وبارك .. :d
سمّي :fl

المعنى اللي نقصد فيه طنشي


موب يعني طنشي لاتهمتمين لها !
+1 :fl

يمكن تحسونها مشكلة بزارين خخخ

:023:

لانك لسه صغيرة تفكرين بهالشي

لا كبرتي بيصير عادي الوضع وماعاد بتقعدين تصيحين ع كل كلمة
:h

,

شكراً للي عبرني انا ومشكلتي :d .
بس فيه ردود حسستني ان امي مو عاجبتني وابي اغيرها :24 .!

ترى والله احب امي ومابي غيرها :$
ولو تجون تقولون لي نبدلها بوحده ماغير تقول تم مارضيت .
ولو اني ماحبها وماودي احسن اللي بينا اكثر كان ماجيت وكتبت هنا .

بس انا اقول لكم التواصل بيننا مو لذاك الدرجه محد فاهم الثاني مره .
انا ابي حل لهالشي ..
التطنيش مو حل لأن صار لي سنين اطنش .
ما استفدت شي .

ابي شي يحسن العلاقه ويقويها ,
بس .

انا طرحت مثال واحد هنا لكن فيه شغلات ثانيه اكبر من كذا بكثير ,
مو السالفة سالفة صغيره وبتعود .
لا ,
السالفه سالفة اني ابي احسن علاقتي مع امي .
طرحت موقف عشان تقولون وين الغلط اللي حاصل وكيف ممكن اصححه .
ممكن يكون مني وممكن منها .
أنا مدري .
لو كان فيني ابي اصححه ,
ولو كان منها قولو لي كيف اتعامل معه بغير التطنيش لأن جربته قبل لا اتكلم .

لأن نفسيتي تعتمد كثير على يومي كامل .
غصب عني .

عرفتوا الحين :d ؟

+ محمد أحب اقول لك : ياكبيييييييير هههههههههههههههه :24

مو مسألة كبر في العمر , هي كبر عقل يا خلف أمك :24

اذا المشكلة في التواصل قعدي معها و فجري هالقنبلة في وجهها :24
لان احيانا الموقف تختلف قرائته من شخص لثاني ..
هي بكلامها معك و تعاملها احتمال كبير انها تحفزك و تظن انها تتكلم لمصلحتك
و غافلة عن الناحية السلبية لتصرفاتها معك .. و في هالحالة ما لك الا المصارحة :d
بعدين انا عندي اعتقاد ان الامهات يفكرون بطريقة محددة و نمطية صعب اختراقها بأي
وسيلة :d عشان كذا لازم تتكيفيين مع اسلوبها و طريقة تفكيرها مهما كانت
مزعجة لك و تتقبلينها و تتعلمين انها ما تأثر على نفسيتك :d
بعدين يا خالة نفسيتك و مزاجك انتي بس اللي تتحكمين فيه .. ما في شي غصب عنك:d
>>>> انا اعتقد في هالشي ايضا :d
و الله يفك عوقك و تعرسين و تفكينا و امك ان شاء الله :d

في البداية أنا آسف أني لم آخذ الموضوع بتلك الجديّة .. :fl


عندما تقولين :

بس انا اقول لكم التواصل بيننا مو لذاك الدرجه محد فاهم الثاني مره .
انا ابي حل لهالشي ..


يوحى بأنك ترين أمك مثل أى صديقة أو زميله أخرى..
ويبدو لي أن هنا مكمن الخطأ..
ذلك أن علاقة البنت بأمها ليست علاقة نديّة فالبنت ليست نداً لأمها..
وهو مبدأ سائد لدى كثير من الفتيات ..
عليك أن تجعلي صلتك بأمك صلة خفض الجناح كما صورها القرآن الكريم
في قوله تعالى : ( واخفض لهما جناح الذل من الرحمة )
فهنا السبيل لتفهمك أمكِ وتحتويك ويتّسع صدرها لك ..

فمتى ماكانت صلتك بأمكِ صلة خضوع ورحمة.. لم يعد من المهم فهم أي منكما للآخر..
حيث أنه لا يطال صاحب ممن يخضع له ويذل بأن يفهمه او يفهم تفكيره..


فالمطلوب من البنت :
التودد والتقرّب وتحمّل الشدّة وعدم الضيق من التأنيب المتكرر ..
حينما تظهرين لأمك وكأنك تريدين أن تتعلمي منها وتفهمي الحياة من خلالها..
وذلك من خلال الحرص على استشارتها في كل صغيرة وكبيرة..
فإنك تسلكين الطريق الى قلبها وعقلها ووجدانها ..

فكما تعلمين :
حين تكبر البنت ترى الأم أن ابنتها أصبحت امرأة ناضجة..
فتريد منها التصرف كما أنها ناضجة..
وتنظر لكل أمر على أنه خطأ تريد أن تصححه لها.. وتغضب وتنهر..
لأنها توقعت أكثر مما تراه لدى ابنتها..
وهذا في الحقيقة هو خطأ من الأمهات.. ولكن لن نصحح الخطأ بخطأ آخر..

لهذا :
كل ما عليك أن تتجنبي مواجهتها.. وتبتعدي عنها أثناء الغضب.. وتتجاهلين استفزازها لك..
وحين تهدأ تجلسين مع أمك جلسة ود وحب وحنان..
بعد أن تكوني أعددتي لها فنجان من الشاي أو القهوة ..
إجلسي معها وتحدثي بطريقة لا تلقي اللوم عليها..
بل ابدأي بالثناء على ما تعمله من أجلك وإخوتك.. وعددي فضلها عليك..
ثم قولي لها ما يزعجك ويضايق راحتك.. وابكي بين يديها..
وانحني إليها بكل الرفق والحب والتذلل واطلبي أن ترحمك وترضى عنك..
فالدموع والعاطفة دائماً ما تنجح مع النساء بوجه عام والأمّهات بوجه خاص .. ;)


وكل هذا :
يحتاج منك الشجاعة وعدم الخجل منها..
لأنه لا أحد يستطيع أن يوصل لها ما تريدين غيرك..
فلا تخافي من إظهار مشاعرك وضعفك وألمك لها..
وادعي لها أمامها وأسمعيها دعائك وثناءك لها..

بعد ذلك :
جربي أن ترشي العطر على مخدتها قبل النوم..
واهديها بطاقة من عمل يديك فيها بعض الدعاء..
وزينيها بالرسم الجميل والإمضاء الوفي..

يجب عليك :
اليقين أنك لن تكافئيها حتى لو حملتها على ظهرك وطفتي بها البيت الحرام..
لهذا إنسي لها غضبها واستفزازها واسبقيها إلى العفو والتسامح..
وتقبيل رأسها ويدها في كل مرة تخرجين وتدخلين بين يديها.. فهو مدعاة إلى الألفة والمحبة ..



هذا وأتمنّى لك التوفيق والسعادة ..
سمّي :fl

بعد ذلك :
جربي أن ترشي العطر على مخدتها قبل النوم..
واهديها بطاقة من عمل يديك فيها بعض الدعاء..
وزينيها بالرسم الجميل والإمضاء الوفي..


ههههههههههههههه كانك تقول امي من ذا اللي كب العطر على مخدتي حسبي الله عليه :24 ، الحين بيشرقني وبابدى اعاطس

والرسايل ايييييه ياذيك الأيام ، مابقى رساله ولا تلوينه ولازخرفه الا سويتها
واخر شيء اصير مطنزه هههههههههه وفي أحسن الأحوال تسكتني ب : شاطره شاطره :24

لذلك ومن النهايه ياكأنه ،
مافيه الا الصبر ، موب معقوله تغيرينها من يوم وليله ولا شهر ولاسنه خصوصاً إذا كان طبع ،
أنا حاولت أغير وفي النهايه تغيّرت أنا :24