سلام عليكم


جولة قوية هالاسبوع بالويكند تبعنا موب تبعهم :k واتوقعها جولة تغريزية للفرق القوية او عالاقل مباريات مشحونة

اخلي البربرة بعدين يلا خلونا نشوف حصل ايه بالقولة الماضية وصيام الفراعنة عن تسقيل الاقوان

إيفرتون1 : 1 مانشستر يونايتد

طبعا ازعجني يزيد وقال يمدحون اسم مراون ورا ماتغير له هاهاها :( واهدي له بهالمناسبة اغنية حمام جانا "مسير :l "

ايفرتون يستلجون قدامنا كثير لكن ماتوقعت بننشب .. ماش تعطل ماهو مستساغ ابد ابد ابد .. الفريق كان يحتاج الفوز بقوة وكل ماقلت الدوري طار اتذكر العام الماضي .. بس انا معلق الدوري للمان بشرطين .. رافا يرجع لجبنه المعتاد بالدوري ويسوي حركات المداورة وكلن يلعب بالدور .. وتشيلسي يبقى مهاجمهم الاساسي انيلكا .. تحقق هالشرطين تخلي فيه امل للمان يجيب الدوري اما غيره الوضع بيكون صعب

سندرلاند2 : 1 نيوكاسل يونايتد


وست بروميتش ألبيون0 : 3 هال سيتي :b

بلاكبيرن روفرز1 : 1 ميدلزبره

تشيلسي0 : 1 ليفربول
وانكسر ريكورد 86 مباراة بدون خسارة بالجسر .. ببساطة سكولاري هدم مابناه مورينيو وكمل عليه ابو صهين وواصل فشله الذريع بالمباريات الكبيرة لكن هالمرة لقى مدرب تكتيكيا ممتاز في حال وحدة وهي اذا بغى يفوز باللي هي به .. صدقني مافيه احد يقواه فما بالكم بمدرب بحجم انشيلوتي وقدرته الدفاعية متقدم عليه 3 صفر وخسر ؟ رافا لو يصير عربجي ويدور الفوز محد بيقواه ببساطة لكن هو كان جبان الا بالابطال لو صمل عليها بالدوري كان شفناه ينافس عالاقل .. ببساطة رافا كان مذهل :)

ويغان أثلتيك0 : 4أستون فيلا

زكي توقف عن التسجيل :r

توتنهام هوتسبير2 : 0 بولتون واندررز

مع هاري ريدناب قدروا السبرز على الـ 3 نقاط لاول مرة هالموسم بالدوري ولكن مازال الدوري طويل ويناير عالابواب ولازم الفريق يتعدل بمهاجم ممتاز بدال بينت بلنتي ومدافع يقدر يلعب 3 مباريات ورا بعض ومايكون دجاجة

مانشستر سيتي3 : 0 ستوك سيتي

روبينيو روبينيو روبينيو :)

وست هام يونايتد0 : 2آرسنال

بآخر ربع ساعة ارسنال يتجاوز حفرة ويست هام باستلجاج اديبايوري :)

بورتسموث1 : 1فولهام

الجولة الجاية هيك :

الثلاثاء :

نيوكاسل يونايتد -- : -- وست بروميتش ألبيون

الساعة حدعش الا ربع .. بيلخموننا يقال لك التشامبيونز هاهاها
شو سبورت 1 و 2 وسكاي كالتشيو ينقلونها
بربسة مالك نيوكاسل تخلي الواحد يتمنى فشل هالنادي .. نقطة التحول اعتبرها بيعة سكوت باركر :h الغبية جدا لويست هام .. والنقطة الثاني تدخل المالك الدب بشغل المدربين وتطفيشهم مثل ماسوى لكيغن .. حتى لو كيغن متوسط تدريبيا انت مسلمه الفريق العام الماضي بوضع سيء وبعد انتقالات اللي لما جت ماتهنى بها ولا قدر يتحكم بالفريق .. معليش مورينيو بكبره فشل باخر موسم له مع جية شيفا بدون طلبه للاعب .. انت وفريقك المخيس ومدربك العادي وش حيثكم اقل من مورينيو وحركة شيفا ؟

الاربعاء:

برضو مصرّين عالوقت حقهم :24

ستوك سيتي -- : -- سندرلاند

حدعش الا ربع والشو ماحددوا من بينقل :r يارجال انقلوها لو بشو كيدز ترا البزران قد ناموا خلونا نشوف خوال كينو يستلجون :l

أستون فيلا -- : -- بلاكبيرن روفرز

حدعش الا ربع
شو كوميدي اكسترا .. يعني مافيه فاميلي غاي؟ :(

مباراة الاجسام فيها لها كلمتها .. استون فيلا بوضع اشوفه احسن بمراحل من الروفرز .. الاستون اشوفهم مجموعة متجانسة وقوية جدا كل ماتحتاجه خبرة علشان توصل لمركز اوربي .. ماهم اقل من البومبي والسيتي ابد :)



هال سيتي -- : -- تشيلسي

حدعش الا ربع
قناة المهبّل اكستريم سبورت

المهبّل هل سيتي راهنت عليهم بالبداية رغم ان التاريخ يقول اللي يتأهل للبريمير من خلال البلاي اوف مايصمل ابد .. اعتقد ان هال تفوق على ويست بروميتش وستوك سيتي بمراحل كثيرة .. تلزيخ ارسنال بالايمرتس وجمع اكبر قدر من النقاط خاصة انهم بالتوب فورم و معنويا مسفهلين بقوة .. بس الخوف من خسارة يبدون يدحدرون عقبها بس ماهقيته مع مدربهم الجيد جدا والزاحف جدا :24 .. تشيلسي بعد خراب الريكورد اتوقع بحال مافازوا بيتازم وضعهم خاصة لو فازت الفرق القريبة منهم .. كالو عالدكة .. مالودا مثله .. وتغيير اسلوب اللعب مطلب لسكولاري خاصة ان كالو يتفلت لما ينزل بديل .. ومالودا طواري .. انيلكا لايعتمد عليه لذلك اشوف لو لعب به مع دي سانتو يكون افضل .. او يرجع بيليتي ظهير ويخلي بوسينغوا جناح بمركزه الاصلي مع بورتو اعتقد .. ويلعب سينكلير يسار وانيلكا قدام .. تشيلسي مثل ماقلت برضو من قبل املهم بالدوري انيلكا .. ان ماصحصح بيخسرون نقاط كثيرة .. لو يكمل جميله ويسجل لين يناير ويجيبون مهاجم سوبر ستار من الممكن يتحسن وضعهم كثير .. وغريبة تشويتة بيزارو الممتاز حاليا وسابقا بالدوري الالماني .. (رجاءا بلا ملاقط ياحقين الالماني هنا خلونا رسميين :l )

بولتون واندررز -- : -- إيفرتون

حدعش على ولا شيء حتى الان


مانشستر يونايتد -- : -- وست هام يونايتد

حدعش على شو سبورت 3

الهامرز يستقعدون لنا دايم لكن نقول ان شاء الله بالمسرح يستلجون العيال ويفوزون لان الدوري ماهو متحمل نزيف للنقاط اكثر من ماصار ..


ميدلزبره -- : -- مانشستر سيتي

حدعش على شو شاشة اكسترا


فولهام -- : -- ويغان أثلتيك

حدعش على شو سيريس اكسترا

المالك المصري × الهداف المصري في قمة حاقة تانية :l


ليفربول -- : -- بورتسموث

حدعش على شو سبورت 4

بالانفيلد صعب يخسر الليفر من فريق متخبط مرة فوق ومرة تحت .. لكن الفوز راح يقوي شخصية ليفربول كبطل دوري محتمل بقوة .. خاصة ان التعثر ممكن يعتبر عودة حليمة لعادتها القديمة .. رافا لو قابل خطة دفاعية لازم يهاجم .. كذا الدوري لو تبيه هاجم وسجل واضغط بالشوط الاول بالذات .. تسجيل هدف واحد ومحاولة الحفاظ عليه خطرة وتودي بدواهي .. خاصة ضد فرق لما تخسر بهدف ماعندها شيء تخسره .. لكن لما ترصهم بثلاثة او عالاقل بهدفين الوضع يصير نوعا ما مطمئن لانك لو بتنكمش بملعبك طول الشوط الثاني ماراح تطلع باقل من هدف واحد يدخل مرماك عالاقل ..


آرسنال -- : -- توتنام هوتسبير

حدعش على شو سبورت 1 و 2

كالعادة ارسنال بيفوز بفرق هدف او تعادل بالكثير لتوتنام .. وضعهم مأساوي ولو انه بدأ بالانتعاش شوي مع رجعة ريدناب لكن السكواد بشكل عام عادي جدا .. حارسهم مسوي ثقل من بداية الموسم وشايل عنهم طامات ونتايج تاريخية وفكهم من صلخ الاندية اللي لو بداله الهدباء روبنسون كان وضعهم بالحظيظ

الجداول يدبرها واحد بالله تراي دايخ يالله اشوف الشاشة :(


:fl

ترتيب الفرق قبل الجوله العاشره

http://www2.0zz0.com/2008/10/27/19/936117170.jpg

وهذا جدول المباريات

http://up.eqla3.com/up/get-10-2008-91gho37l.jpg


والله ياهي جوله بنت . . . :b
ديربي لندن العالمة البارزه فيه . . بيجيك قوة ملاعن فيه . . :b
معروف ان توتنهام لو انه بعيد عن مستواه بس من يلعب قدام الارسنال يستلجون بشكل غير طبيعي
يعني بالعربي كذا مباراه ما تتفوت . . وضع الانبطاح عندها لابد منه :c

مانشستر ووست هام . . :(
هالفريق ما اداني طاريه . . بس انا واثق ان الريد ديفلز بيشلخون والديهم تشليخ :h. . واتوقع فيها اكثر من قولين للمان . . بربا ما ودك تعقل وتتحرك شوي :r . . رونالدو اخر فرصه لك والا ترى بغير نك نيمي واحطه اوشي :m
الفريق مستواه في تصاعد . . بغض النظر عن مباراه ايفرتون اللى مدري وش صار لحبايبنا
قيقز (( شباب بالله وقفوا دقيقه هنا لا احد يرد احتراما لوجه القطو:h))

ما عندهم نيه يغيرون وقتها :(

للمانشستراويه:fl

هال سيتي والجحلط والدلولخ والكرهين واللى كل شي موب زين :d
مباراه نار والله لكن افلقوني بسطل دهانات الجزيره لون فسفور اذا شفتها :d

يعطيك العافيه يا زعيم ع التقديم للجوله :fl

http://www.mediafire.com/imgbnc.php/39ab6c01bfc4a68b5d4452480565d8b85g.jpg

وهذا ترتيب الهدافين يتصدرهـ الفرعوني عمرو زكي الي احس انه خلاص يبي يوصل الى هدفه العاشر ويبي يوقف ..

على فكرة .. مدرب ويجان ستيف بروس حدد هدف لـ عمرو زكي انه يسجل على الاقل 10 اهداف مع الفريق .. والان زكي مسجل 8 اهداف في كل المسابقات ..

سييو .. :)

زعيم هلالي .. عوافي على التقديم يابطل ..

بالنسبة لي هذي أول جولة بتابعها .. بركااات التوقيت الخالع حقهم :d ..

ماعندي كلاام واجد أقووله ... بس ودي الليفر يركز على البريمر .. ياليت لو يجيبه ..

""
""

http://i.dailymail.co.uk/i/pix/2008/06/06/article-0-017C6F1800000578-894_468x382.jpg

الخال يقول بنسحق توتنهام لعيون الجمهور

""
""

http://d.yimg.com/us.yimg.com/p/ap/20081004/capt.d954481637514541b737ab83af0b5a60.britain_socc er_nsh111.jpg?x=400&y=275&q=85&sig=SCsQC9gzSYuDa30Odx2GSQ--

خربها المراهق يقولون توتنهام ممكن يحصل على نقطه من سيدات ارسنال :d


""
""

http://img.skysports.com/08/09/218x298/Scolari1_1204146.jpg

هالطعس يفكر يشتري لاعبين انجليز بالفتره القادمه

""
""

http://newsimg.bbc.co.uk/media/images/42374000/jpg/_42374871_ogbuke203.jpg

تشلسي يفكر يضم الخال هوفنهايم اوباسي


""
""

http://d.yimg.com/i//ng/sp/eurosport/20081029/25/04c6d99e74bd2a20b1421114d38d9ce4.jpg

انيلكا يثني على هال ستي ويتمنى الفوز حتى ولو بدون امتاع وبخصوص مباراتهم مع الليفر يقول يقول كنا سنخسر اجلاً ام عاجلاً


""
""


http://www.manutd-france.com/photos/fergie2.jpg


البثر مبسوط من فوز الليفر على تشلسي ويقول الفوز فتح المنافسه للجميع


""
""

عوافي زعيم معليش نسيت :h :d

خربها المراهق يقولون توتنهام ممكن يحصل على نقطه من سيدات ارسنال


المراهق عندة الحاسة السادسة يدري ان توتنهام بياخذون نقطة من سيدات الارسنال :d ياشين الهياط بس ههههههه
انتهت مباراتهم الحريقة اربعة اربعة

البثر مبسوط من فوز الليفر على تشلسي ويقول الفوز فتح المنافسه للجميع

يلعن شكلة البجيح كل ذا يعني سافط الليفر ومهو هاقي انهم كفو :d

نتائج المباريات المهمة

تشلسي 3 هال سيتي 0

الليفر 1 بورتسموث 0

المانيو 2 وست هام 0

سيدات الارسنال :d 4 توتنهام 4

عوافي زعيم

صبحكم الله بالخير

جولة مهبولة .. خانني توقعي بتوقف الفرق المنافسة عالدوري .. المان والليفر وتشيلسي تخطوا فرق صعبة وبطريقة تثبت ان شخصية البطل مازالت موجودة عندهم .. المان المشكلة يعيش مرحلة او بأفضل الاحوال كاااان يعيش مرحلة صعبة بين جية بربا ورجعة كريس يعني الخطة مستحيل تبقى كما كانت لذلك لازم للتأقلم .. اللي هو مطلوب لو هاللاعبين جاهزين قبل الدوري مابالكم بعد 3 جولات واكثر؟

المان ماعليه ماشي بشكل جيد ومع الوقت اعتقد بيتصاعد مستواه خاصة مع رجعة كاريك .. ومع قرب الكريسمس والبوكسنغ دي المان عالورق ماعليه خوف لان دكته حريقة وهالدكة تملك دكة ..!! من سنين طويلة جدا ماصارت للمان ولا اعتقد صارت بالالفية ابد ! هو انا عندي خوف من طفش تيفيز نهاية الموسم ويطلع .. بربا الوافد الجديد .. روني يعامل معاملة ملك .. تيفيز اقرب واحد ممكن يبغى يطلع لو ما احسن السير نظام المداورة .. تيفيز بياخذ فرصته وزيادة بس خايف من الطنقرات اللي تجي زي قلة حيا هاينزه يوم قال سعيد بالمنافسة مع ايفرا بعدين قال بروح الليفر ! سلامات يالكاتشب لاقينا بنقالية نبيع سبحات؟

تشيلسي بفوزه على هل يعزز موقعه وثقته بنفسه .. هل المفروض ينسون المباراة ولايزعلون كثير يعني اللي صار مهما كان شيء عادي ومتوقع انه يصير عاجلا او اجلا .. تأهلتوا بالبلاي اوف يعني خسارتين فقط حتى الان شيء قياسي ! وخسارة منها ضد تشيلسي ! انيلكا هدفه كان بتوقع منه ان فيه سوء تفاهم بين الحارس والدفاع بيصير وماقصر الرجال هج ولقطها وسجل .. يشكر عالمجهود لكن يبقى ماقدم شيء للان ولازم ينضبط ..

الليفر وفوز صعب لكن الاهم 3 نقاط بغض النظر عن الكيفية خاصة ان رافا يقولون مابطل حركاته بالروتيشن؟

ديربي لندن كان ممتع جدا .. خاصة بالشوط الثاني بعد ماوصلت النتيجة 2-1 .. توتنام من الفرق اللي تابعتها وبقوة من سنتين .. مع مارتن يول وراموس وحاليا ريدناب .. هالفريق ميزته مايستسلم ابد .. لو خسران 3 اهداف مستحيل يستسلم سواء بالوايت هارت لين او حتى الايمرتس ! اللاعبين ماييأسون ابد والروح كثير تشيل الفريق اكثر من الخطط اللي لو كانت موزونة تحسن حال السبرز ..

نقطة التحول بنظري بالمباراة هي دخول ايبوي .. توقعته مكان دينيلسون ويغطي النص .. يوم شفته بدال والكوت توقعت ايبوي بالنص ودينلسون يمسك الطرف بس اعتقد صار فيه ارتباك بالنص وتلخبطت المهام .. فينقر نظريا ماغلط لانه متقدم بهدفين ويبي يمسك النص .. اللي خان ارسنال الخبرة .. الركنية الاخيرة وفرق هدف باخر الدقايق لما سيسك وسانيا جنب بعض توقعت بيسوون تحضين عالكورة ويكسبون فاول او عالاقل وقت .. اللي صار انلعبت بسرعة وصارت مرتدة وراحوا غلطة .. غياب المحور الدفاعي + قلة الخبرة + روح توتنام العالية جدا هي سبب نتيجة المباراة بنظري .. ريدناب داخل المباراة بدون اي ضغط .. مدرب قدير وكان هادئ جدا رغم تخلفه بهدفين .. بأمانة يوم شفت بينت بلنتي طاب بدال بافليتشينكو ماتوقعت التعزيز الهجومي بيكون اقوى .. كلامي ماكان غلط لان فعلا بينت كان واقف بس عكس لو كان جنب بافليتشينكو كان بيراكض والروسي يستلم ويشوت .. لكن بينت أدى دوره كمهاجم وحيد وثبت قدام وتابع كورة لقطها وسجل قول ثمييييييين .. لان الروسي كان طافي وثقيل جدا ..دخول جونتر بدال هوتون كان غريب للبعض بحكم الخسارة بفرق هدفين .. لكن لما تكون عندك ثغرة وانت خسران وتملك تبديلات .. سد الثغرة بعدين هاجم خاصة لو فيه وقت .. هوتون كان سيء وطلعه ريدناب واختفى الضغط الرهيب على الجهة اليمنى للسبرز .. بعدين نزل لينون وسجل هو الثاني ..

ارسنال اخطأ لاعبيه اكثر من الاصبع .. بحكم ان الاصبع اصلا غلطان من بداية الموسم بدينلسون كمحور دفاعي ..

توتنام صحصحوا بس يبي لهم سنتر جامد بيناير اهم شيء .. وكذا مركز يترقع ..

هدف رونالدو الثاني لايفوتكم استهبال برباتوف فيه .. ياهو خاااااااااااااااااااااااااااااااااااالع